Däischter Deeg

De Gaston Rollinger (*1946), Dichter a Pionéier vun der Lëtzebuerger Filmproduktioun, huet säi ganzt Liewen am Quartier Hiel zu Esch verbruecht. An dësem Mikrokosmos um Fouss vum Kazebierg, tëscht der franséischer Grenz, der aler Brasseur Schmelz, de Weieren an de Minièren am Ellergronn sinn tëscht den 1990er an den 2000er Joren och seng ronn 40 Gedichter op Lëtzebuergesch entstanen.

Ouni Pathos, ma net ouni Humor, schwätze si an enger direkter, billerräicher Sprooch universell Theme wéi d’Liewen, d’Aarbecht, den Doud an d’Vergänglechkeet un. D’Hiel an den Niddergang vun der Eisenindustrie bidden dozou den Dekor.

De Museker a Regisseur Fränz Hausemer kennt den Dichter säit senger Kandheet. Wärend e puer Joer huet hie sech intensiv mat sengem Wierk beschäftegt an eng Partie vu senge Gedichter vertount. Dorausser ass e ganz perséinlechen an intimisteschen Album entstanen.  

Texter: Gaston Rollinger
Gesang, Piano, Gittar a musikalesch Leedung: Fränz Hausemer
Batterie, Perkussioun: Benoît Martiny
Kontrabass: Benoît Legot
Elektresch Gittar: Greg Lamy
Bassklarinett: Michel Pilz
Viola: Renata Van Der Vyver
Opnam a Mixage: Mike Butcher
Mastering: Alan Wrad, Electric City
Opnamen: Schlim Tounstudio a Roll Studio
Grafik: SKIN