Peffermill(ch)en

D’Wuerzele vun der ›Peffermill(ch)en‹ ginn zéreck op 1970, wéi eng Partie vun hire Memberen am ›Rido Gaasperech‹ ënnert der Mathëllef vum Tun Deutsch Boulevardtheater gespillt hunn, ier si an den 1980er Joren als ›Rido Lëtzebuerg‹ ënnert der Regie vum Charles Muller literaresch-politesch Theaterproduktiounen op d’Bün bruecht hunn. E puer Leit aus där Zäit hunn 1989 de Cabaret-Ensembel ›Peffer-mill(ch)en‹ gegrënnt.

Zanter hiren Ufäng koumen esou vun 1989 bis 2014 am Ganzen 16 Programmer mat literareschen, gesellschaftskriteschen a politesch aktuellen Texter zesummen, dacks zweesproocheg, an ëmmer mat Live-Musek. Verzielt gëtt an dësem Buch d’Geschicht vun der ›Peffermill(ch)en‹. Vill Fotoen, Affichen an Dokumenter a virun allem eng Auswiel vun Texter aus all deene Joren erméiglechen eng kleng Zäitrees an e Bléck an d’Geschicht vun dësem Cabaret-Ensembel.