Pir Kremer – ZesummegePIKtes

Fir dem Auteur säin 100. Gebuertsdag beliicht dës Publikatioun zur Ausstellung Pir Kremer - ZesummegePIKtes d’Liewen an d’Wierk vun deem Auteur, deem seng Stëmm wuel wéi keng aner d’Lëtzebuerger Radio- a Sproochelandschaft gepräägt huet. De Band proposéiert e Réckbléck op dem Auteur säi Liewen, op seng villfälteg Theaterproduktiounen (Revuen, Lidder, Sketcher), seng Radios- an Televisiounsemissiounen (Um Staminet, Lauschterstécker a Radiosrevuen) an op säi Schafen als Satiriker. E bitt doriwwer eraus eng originell Vue op manner bekannte Facettë vun der Perséinlechkeet Pir Kremer, wéi z. B. seng Aktivitéit als Publicitéitstexter fir bekannte Lëtzebuerger an international Marken a seng Zesummenaarbecht mat verschiddene Plackelabelen.

Dës Publikatioun erméiglecht domat en Abléck a bis ewell nach ni gewisen Dokumenter, léisst dem Pir Kremer seng Frënn a Coauteuren zu Wuert kommen a vermëttelt unhand vu Biller, Stëmmen an Texter déi besonnesch Atmosphär vum Phänomeen Pir Kremer.

Beim Buch läit eng CD dobäi, déi de Centre national de l’audiovisuel produzéiert huet. Ze héiere sinn Originalbäiträg a Lidder an nei Vertoununge vum Georges Urwald.